PARTIDA SOCIALDEMOCRATICA GRISCHUN

Tenor nus è la politica vegnida determinada ils davos onns memia fitg da lobbiists e da lur interess da profit. Perquai na vai betg enavant en connex cun il salvament dal clima, las premias da las chassas da malsauns creschan ad in crescher e dunnas ed umens gudognan anc adina betg medem bler. Nus dovrain innovaziun e betg stagnaziun.

Nossas finamiras:

  • Nus lain salvar il clima.
  • Nus lain cumbinar l’avertura europeica cun protecziun da pajas.
  • Nus lain finalmain egualitad per tuts e tuttas ed ina politica da famiglia moderna.
  • Nus lain premias pajablas ed in bun provediment da sanadad.
  • Nus lain ina politica independenta da filz e lobbissem.

Philipp Wilhelm, President PS Grischun

Doris Caviezel-Hidber, Vicepresidenta PS Grischun
Lukas Horrer, Secretari da PS Grischun

Part dal moviment da lavurantas e lavurants
La partida socialdemocratica da la Svizra è vegnida fundada il 1888. En Grischun datti dapi il 1906 ina PS activa. Dapi sia fundaziun è la PS ina part dal moviment dals lavurants internaziunal. Els han cuntanschì – almain en ils pajais sviluppads – da far or da proletarias e proletaris sfruttads e marginalisads a l’ur da la societad, burgaisas e burgais segirs da sasez cun ils medems dretgs. Ensemen cun ils sindicats ha ella conquistà ils dretgs dals lavurants, cumbattì per pajas gistas e construì il stadi social. Il svilup a l’actuala societad da servetschs ha chaschunà che commembers da la PS na derivan oz betg pli da la classica gruppa da lavurants, mabain da ma-niera creschenta da la classa mesauna progressiva. Correspundentamain sa slargia la politica da la PS.

Libertad en il center
La PS s‘engascha per la libertad da mintga uman. “Liber ed egual en dignitad e dretgs”, uschia tuni en la decle-ranza generala dals dretgs umans. Nus vulain ina societad dals burgais e da las burgaisas libras ed egualas. Li-bertad implitgescha per nus adina era la libertad da quel che patratga auter. La libertad ha dentant cunfins nua ch’ella limitescha la libertad dals auters. Questa chapientscha fundamentala e l’engaschament senza cumpro-miss per la libertad da tut ils umans han manà antruras a la ruptura istoricamain necessaria cun il communissem.
Libertad na munta dentant betg mo la refusaziun da sistems totalitar u dictaturas. Libertad munta adina era segirezza materiala e sociala per pussibilitar ina vita en dignitad.

La PS sco lavuratori da democrazia
La PS è dapi sia fundaziun ina partida democratica. La democrazia sociala na vesa l’uman betg sco forza da lavur submissiva, mabain sco individuum autonom che cundecida. La PS ha tranter auter cumbattì cun success per il dretg d’elecziun da proporz per il Cussegl naziunal u per il dretg da vuschar per las dunnas. La democrazia sociala è era la defensura da la democrazia, sch’i sa tracta da cumbatter sia sutminaziun tras l’economia. Il pievel decida las reglas per l’economia – e betg il cuntrari. Quai è nossa persvasiun. La democrazia politica sto perquai vegnir sviluppada vinavant tar la democrazia economica.

Esser la ierta da l’illuminissem & sviluppar la globalisaziun da maniera persistenta
Saja quai ils dretgs umans, saja quai il motto „libertad, egualitad e fraternitad“: quests basegns fundamentals stattan dapi l’Illuminissen dal 18avel tschientaner en il catalog da pretensiuns da tut las organisaziuns progressivas. Las pretensiuns concretas èn sa transfurmadas natiralmain en il decurs da la lunga istorgia, la direcziun è dentant restada la medema. Blers puncts che la PS ha pretendì avant onns sco visiuns curaschusas, èn daventads simpla-main normalas en la societad actuala. AVS, segirada da malsauns, dretg da vuschar per las dunnas e la segirada da maternitad, quai èn oz chaussas che sa chapeschan da sasez. Il nov decenni vegn a purtar grondas sfidas, era sin nivel internaziunal. La crisa economica ha fatg crescher da maniera massiva la fom en il mund e mess en dumonda bleras plazzas da lavur segiras. Las midadas dal clima pertutgan sco emprim ils pli paupers da quest mund da maniera existenziala. Ditg curt: la globalisaziun sto daventar pli democratica, pli persistenta e pli solidarica.

Sco PS dal Grischun prendain nus questas incumbensas en il senn da noss principis e da nossa enconuschientschas, en il rom da nossas pussaivladads, cun in sguard enavant positiv. L’avegnir è avert – nus vulain furmar el!

STATUTS, PROGRAM DA PARTIDA & CO.

DEMOCRAZIA SOCIALA - VIDEO