Parolas per las votaziuns federalas dals 18 da zercladur 2023

A chaschun da ses di da partida l’avrigl ha la PS Grischun decidì las parolas per las votaziuns federalas. Ella s’engascha spezialmain per in Gea per la lescha per la protecziun dal clima. Percunter refusa ella la realisaziun actuala da taglia minimala da la OECD. A la prolungaziun da la lescha da Covid-19 di ella gea.

A chaschun dal di da partida l’avrigl n’ha la PS Grischun betg mo nominà las candidaturas per il Cussegl naziunal, ma er sa fatschentà cun las votaziuns sin stgalim naziunal. Ella s’engascha spezialmain per in Gea tar la lescha per la protecziun dal clima e sustigna er la campagna cun agens meds e numerusas acziuns sin via.

Protecziun dal clima per la segirtad d’energia e provediment

La protecziun dal clima è la pli impurtanta incumbensa da noss temp. Ord vista da la PS cumenza la nova lescha per la protecziun dal clima là nua ch’i dat en Svizra il pli grond effect da sbassada da la producziun da CO2: vul dir il remplazzament da stgaudaments che funcziunan oz cun carburants fossils. La lescha da la protecziun dal clima sustigna efficaziamain ils proprietaris e las proprietarias da chasas tar quest remplazzament cun energias renovablas e renda quatras la Svizra pli independenta da l’importaziun da materias primas. Protecziun dal clima signifitga uschia er segirtad d’energia e provediment. La PS Grischun sa participescha activamain en il pro-comite, contribuescha agens meds per la campagna e metta a disposiziun in grond dumber da voluntaris e voluntarias per l’acziun da flyers sin via.

Ina giada Na, ina giada Gea

La PS Grischun refusa l’actuala realisaziun da la lescha da taglia minimala da la OECD. Quella favorisescha memia fitg chantuns cun taglias bassas sco Zug ed incitescha en moda dischavantagiusa la concurrenza da taglias tranter ils chantuns. Da principi approvescha la PS Grischun ina taglia minimala da gruppas da grondas interpresas. Ella sto dentant nizzegiar pli fitg a la publicitad. La PS Grischun di gea a la prolungaziun da la lescha Covid-19. Questa lescha duai dar vinavant la pussaivladad da proteger persunas particularmain periclitadas e d’introducir nuncumplitgadamain medicaments cunter grevas furmas da Covid. Plinavant regulescha ella l’immigraziun da frontalier(a)s per il cas na probabel dad ina nova serrada dals cunfins e permetta en cas da basegn da far certificats per il traffic internaziunal.