En bleras regiuns dal Grischun – spezialmain en las vischnancas turisticas ed en ils centers – daventi adina pli difficil per la populaziun indigena da chattar spazi d’abitar pajabel. Ils tschains da locaziun creschan ed èn daventads il killer da la capacitad da cumpra numer 1 en il Grischun. Plinavant: Bleras famiglias e persunas giuvnas èn sfurzadas da partir pervi da la mancanza d’abitaziuns. Or da vista sociala è quai inacceptabel e periclitescha l’avegnir da las regiuns pertutgadas. Perquai dovri ina midada da direcziun clera ed evidenta en la politica dal spazi d’abitar.

Nus pretendain in fondo chantunal per il spazi d’abitar che possibilitescha la creaziun d’abitaziuns d’util public en las regiuns pertutgadas. E nus dumandain ina meglieraziun da la lescha davart las abitaziuns secundaras per garantir ina quota d’emprimas abitaziuns per immobilias da dretg vegl.

La protecziun dal clima ed il provediment d’energia schuber e segir èn ils pensums pli gronds da nossa generaziun. Quellas sfidas pudain nus prender a maun be tuts ensemen. Adina dapli umans sa stentan per in stil da vita duraivel. Ma tscherts concerns prendan en cumpra per lur profits che nossa natira, nossa fauna e nus umans vegnin en privel. Quai vala cunzunt per las regiuns da muntogna e per il Grischun. En il medem temp porscha la midada energetica gist en las muntognas nundumbraivlas schanzas per posts da lavur e creaziun da valur.

Nus pretendain en il Grischun la realisaziun consequenta dal Green Deal che la PS ha lantschà. Nus procurain per ina realisaziun consequenta ed ecologicamain cumpatibla da l’offensiva solara en il Grischun ed ans engaschain per l’iniziativa dal fondo climatic che vul facticamain introducir in Green Deal per l’entira Svizra. E nus dumandain fermas mesiras per ch’il plaz da finanzas svizzer vegnia obligà da far fatschentas che èn cumpatiblas cun la cunvegna dal clima da Paris. Cun quai contribuin nus a la realisaziun dal pensum da l’entira umanitad da proteger il clima e tschiffain las schanzas per noss chantun muntagnard.

Er sche la populaziun grischuna ha approvà cleramain l’iniziativa per la tgira, resta la mancanza da forzas da lavur qualifitgadas en il sectur da tgira e sanadad in dals pli gronds problems dal Grischun. Buna tgira, assistenza professiunala ed il meglier provediment medicinal èn las premissas per in bun avegnir da noss chantun.

Nus pretendain ina realisaziun cumpletta e rapida da l’iniziativa da tgira. Per quai na dovri betg mo in’iniziativa da formaziun, ma er meglieras cundiziuns da lavur per tut las persunas engaschadas en il sectur da la sanadad. La tgira ed il provediment medicinal na dastgan betg vegnir considerads be sco factur da custs. In’ulteriura economisaziun dal sectur da la sanadad e las tendenzas da centralisaziun ston vegnir fermadas. Perquai sustegnain nus er las regiuns da provediment da la sanadad stgaffidas en il Grischun e pretendain ch’il sectur da la sanadad vegnia considerà sco service public e na sco model da fatschenta.

Grazia al moviment feministic vegn la societad vinavant – er en il Grischun. Ins senta ina ferma voluntad da transformaziun, e quai è bun. Però: i manca anc bler per cuntanscher nossa finamira. Finanzialmain èn las dunnas anc adina cleramain sut il nivel dals umens. Geniturs giuvens han da batter tranter professiun e famiglia. Dunnas ed umans queers èn vinavant confruntads cun sexissem e violenza. L’egualitad n’è betg ina chaussa privata, ella va tiers a nus tuts.

Nus pretendain egualitad da paja e nus vulain serrar la largia da rentas da bleras dunnas. Nus ans engaschain per Kitas pajablas per tut las famiglias – en tut las regiuns. En il Grischun avain nus gia dumagnà atras il Cussegl grond ina lescha progressiva, naziunalmain ans engaschain nus per la Kita-Iniziative e per in temp da geniturs

adequat. Plinavant: Nus cumbattain per dapli respect, cunter violenza e cunter sexissem en il mintgadi.

La posiziun da la Svizra en l’Europa ed en il mund è donnegiada. Il Cussegl federal n’ha anc adina betg ina soluziun per la relaziun da noss pajais cun l’UE – la megliera vaschina che noss pajais ha gì insacura. Malgrà la criminala guerra d’attatga da la Russia cunter l’Ucraina èn grondas parts da la politica bloccadas en in’interpretaziun antiquada ed opportunistica da la neutralitad. Ultra da quai ha la fusiun tranter la CS e l’UBS sfurzada tras cun dretg d’urgenza mussà che noss pajais sa chatta facticamain en ostagi da las bancas grondas ed gist uss concret da la monsterbanca UBS. Quai è in privel per nossa suveranitad e nossa democrazia.

Sco abitant(a)s dal Grischun, chantun da turissem e da cunfin, pretendain nus perquai che las dumondas instituziunalas cun l’UE vegnian schliadas. E nus dumandain dal Cussegl federal ch’el considereschia la Svizra sco advocata dal dretg internaziunal e ch’el semettia, en la guerra, decididamain da la vart da l’Ucraina. E nus pretendain natiralmain ina regulaziun da las bancas che restrenscha la pussanza da la monster-banca UBS e sbassa ils ristgs per la societad. Excess da bonis e renditas da chapital privat absurdas ston tutgar al passà.