La PS Grischun ha publitgà oz sia plattafurma electorala. Sco ella fa valair là, s’engascha ella per dapli spazi d’abitar pajabel, in’efficienta protoceziun dal clima, in bun provediment medicinal, vaira egualitad e per ina Svizra europeica.

A chaschun da las elecziuns per il Cussegl naziunal ha la PS Grischun publitgà sia plattafurma electorala programmatica. Per l’elavuraziun èn responsabels ils/las tschintg candidats/ candidatas Jon Pult, Franziska Preisig, Renate Rutishauser, Michal Hohl e Tobias Rettich sco er il directori da la PS Grischun. Spazi d’abitar, protecziun dal clima, sanadad, egualitad e la relaziun cun l’Europa èn ils temas principals da la PS en il cumbat electoral da quest onn.

Spazi d’abitar e protecziun dal clima
La PS cumbatta tenor plattafurma electorala per spazi d’abitar pajabel, per frenar la depopulaziun en las valladas ed augmentar la capacitad da cumpra en la populaziun. Perquai s’engascha ella per in fondo chantunal per il spazi d’abitar ed ina meglieraziun da la lescha per abitaziuns secundaras. Ella vul proteger meglier las emprimas abitaziuns da dretg vegl. Pertutgant la protecziun dal clima stat la PS per ina realisaziun consequenta dal Green Deal en il Grischun e vul render cumpatibla la plazza da finanzas naziunala cun la cunvegna dal clima da Paris.

Sanadad, egualitad ed Europa
Per in bun provediment medicinal en tut las regiuns e per meglieras cundiziuns en la tgira, vulan ils candidats e las candidatas ina realisaziun rapida e cumpletta da l’iniziativa da tgira. La sanadad publica è service public e betg in model d’affar. Purtar enavant l’egualitad è in’ulteriura finamira da la PS. Ella pretenda egualitad da las pajas e vul serrar la largia da rentas da bleras dunnas. Plinavant s’engascha ella per kitas pajablas ed in temp da geniturs commensurà. Per finir stat la PS Grischun per ina Svizra europeica, independenta da las bancas.