Gea, el vul: Jon Pult candidescha per il Cussegl federal. Quai ha el communitgà glindesdi ad in point de presse da la PS Grischun en Chasa federala. La candidatura da Pult stat per diversitad e coesiun.
„La diversitad e la coesiun marcheschan mia vita“, punctuescha Jon Pult durant sia intervenziun en quatter linguas davant las medias. Creschì si è Pult sco burgais dubel, tranter l’Engiadina bassa rumantscha, la metropola taliana Milaun e la chapitala grischuna Cuira. Sco student e suenter sco collavuratur en ina IPM (KMU) era el dimorant durant l’emna a Turitg. Ensemen cun sia consorta viva el uss tranter Cuira e Berna.
In Cusseglier federal per tuts
L’urbanitad, l’avertura vers il mund e la mobilitad marcheschian ses pensar, exact sco il vegl antic spazi cultural da las Alps, cuntinuescha Pult e constatescha: „ Jau sun daventà politicher perquai che jau vuless contribuir ad ina politica per tut ils carstgauns en noss pajais. Pult menziunescha concret trais grondas sfidas. Primo: ina refurma da la sanadad publica senza reducziun da la prestaziun. Secundo: il fatg da cuntanscher las finamiras climaticas sco ovra communabla e na sco cumbat cultural. Terzo: la stabilisaziun da la relaziun cun l’Uniun europeica.
Giuven ed experimentà
Pult è accumpagnà dad Andri Perl, president da la PS Grischun, e da Sandra Locher Benguerel, Cussegliera naziunala. Perl evochescha il mussament da prestaziun da Pult en sia carriera da ventg onns – da la politica communala sur la politica chantunala fin la politica federala. Ultra da quai haja Pult experientschas cun IPMs (KMU), tant en la lavur operativa sco sin il stgalim strategic. Che Pult sco politicher da la generaziun giuvna giauda auta stima en la citad federala, explitgescha sia collega Sandra Locher Benguerel. Quai demussia sia elecziun sco president da la cumissiun per traffic e telecommunicaziun. Quai demussia era sia elecziun sco vicepresident da la PS Svizra.
La PS Grischun stat cumplainamain davos Pult
La PS Grischun sa legra da la decisiun da Jon Pult da sa metter a disposiziun per las elecziuns dal Cussegl federal. Ella è superbia da pudair proponer a la fracziun federala in candidat uschè cumpetent. La direcziun da la PS Grischun recumanda unanimamain da nominar Pult sco candidat per las elecziuns dal Cussegl federal a chaschun dal di da partida dals 14 d’october.
