La fracziun dalla PS e dalla Verda ei seradunada a Mustér per sepreparar per la sessiun vegnenta. A caschun da quella vegn la fracziun a sedustar encunter ina politica da taglia nunconcensiusa e da stretg horizont. Perencunter vegn ella a sustegner la transformaziun digitala el Grischun. Ulteriur ha ella nominau Chiara Richter-Baldassarre per la futura dertgira superiura.
Mintgamai il November meina la fracziun dil Cussegl Grond dalla Partida Socialdemocrata ed ils dus commebers dalla Verda atras in clausura da dus dis. Ins seprepara per la la sessiun vegnenta, denton pren era la caschun da sapprofundar en themas politics. La sessiun dil december da quest stat primarmein el segn dalla debatta dil preventiv ed en quei connex cun las discussiun da reducir il pei da taglia.
Reducziun dil pei da taglia nunsolidarica Suenter che la PLD haveva proponiu ella sessiun dil zercladur, da reducir il pei da taglia per persunas naturalas per 10 pertschien, ha la Regenza ussa reagau cun ina proposta per la reducziun da 5 pertschien. En vesta dalla buna situaziun finanziala sa la PS simaginar in levgiament fiscal per persunas naturalas. Quella sto denton esser gesta e risguardar aspects socials. Las propostas dalla PLD e dalla Regenza pon buca satisfar a quellas pretensiun. Anzi, entras la progressiun favorisescha ina tala reducziun da taglia principalmein glieud beinstonta, che han il pli pauc da basegns dad ina discargada fiscala. La PS favorisescha ord quie motiv en emprema lingia in alzament digl import liber da taglia sco era concretas bonificaziuns da taglia. Ella vegn a proponer talas mesiras e caschun dalla revisiun dalla lescha da taglia igl onn vegnent.
Gie alla transformaziun digitala Ulteriur di la PS claramein all’acceleraziun dalla transformaziun digitala e beneventa las propostas dalla Regenza el rapport “Strategia per in’administraziun digitala”. In credit da rama da Fr. 35 Milliuns duei pussibilitar da rinforzar l’administraziun dil cantun sur ils proxims onns cun persunas dil fatg. La finamira ei, che convischins e convischinas sco era interpresas ein levgiai digitalmein ell’ interacziun cun l’administraziun.
Nova derschadra Suenter la refuorma da la giustizia elegia elega il Cussegl Grond il december per l’emprema gada la dertgira superiura, che vegn ad entscheiver cun sia lavur l’entschatta digl onn 2025. Sper la vice-presidenta dalla dertgira administrativa Ramona Pederetti e derschader cantunal Christof Bergamin propona la fracziun dalla PS al Cussegl Grond d’eleger Chiara Richter-Baldassarre Actualmein ei dunna Richter-Baldassarre derschadra extrordinaria alla dertgia cantunala. Ella ha perschuadiu la fracziun entras sia cumpetenza dil fatg e persunalas.
Brat da meinis cun persunalitads dil liug Agl ur dallas sedutas ha la fracziun dalla PS giu la caschun da sentupar cun il president communal René Epp, igl investur Marcus Weber e cun Mike Goar, il Managing Director dad Andermatt-Sedrun Sport AG. La partida socialdemocrata engrazia cordialmein per la sentupada captivonta e la hospitalitad a Mustér.
