A chaschun dal congress da nominaziun ils 29 da november ha la PS Grischun nominà candidat:as per il Cussegl grond e lantschà lur iniziativa dal pievel per dapli spazi d’abitar pajabel. A la PS reusseschi da preschentar in champ da candidaturas zunt multifar per in Grischun social.
Sonda suentermezdi ha la PS Grischun envidà en il Marsöl a Cuira al di da partida da nominaziun. Passa 120 commembras e commembers da la PS dal Grischun han lantschà uschia il cumbat electo-ral 2026. Il di da partida è stà sut l’ensaina da l’engaschament per in Grischun social. Sper las temati-cas dal clima, egualitad, provediment da sanadad e democrazia metta la PS – cun lantschar sia iniziati-va – in focus sin la politica d’abitar en ses cumbat electoral.
100 candidaturas per in Grischun social
Sonda ha la PS pudì nominar 100 da 120 pussaivlas candidaturas per il Cussegl grond. Las candidatas ed ils candidats eran vegnids nominads ordavant en las secziuns da la PS. A la PS èsi reussì da metter ensemen in champ da candidaturas fitg vast en l’entir chantun. Spezialmain allegraivel è il grond dumber da candidaturas da dunnas. Cleramain dapli che la mesadad èn dunnas. La PS ha buna speranza d’occupar las plazzas da glistas anc libras las proximas emnas e sa legra sin in cumbat electoral plain tensiun.
Lantschà iniziativa chantunala «Per dapli spazi d’abitar pajabel»
Il spazi d’abitar pajabel è stgars en il Grischun. En bleras regiuns s’augmentan dapi onns cuntinuadamain ils tschains ed ils pretschs da terren. Adina dapli famiglias na chattan betg pli ina abitaziun pajabla u ston impunder ina gronda part da lur entradas per l’abitar. Malgrà quest svilup n’è la maioritad en il Cussegl grond betg sa decidida per mesiras effizientas. Il zercladur da quest onn èn las propostas per promover dapli spazi d’abitar proponidas da la regenza vegnidas diminuidas, instruments centrals èn vegnids stritgads ed ulteriuras investiziuns èn vegnidas refusadas. La PS Grischun è da l’avis ch’il martgà na possia betg schliar la mancanza d’abitaziuns e ch’i dovria ina politica activa per spazi d’abitar sco er in sustegn public cun cleras finamiras.
Al congress ha la PS Grischun perquai lantschà unanimamain ina iniziativa chantunala dal pievel che prevesa l’installaziun d’in fond per abitaziuns d’util public dotà al cumenzament cun almain 100 mil-liuns francs. Il fond duai sustegnair vischnancas e patruns da construcziun d’util public per acquistar terren da construcziun u immobiglias existentas che han la finamira da stgaffir u mantegnair spazi d’abitar pajabel. Uschia duain bains immobigliars ed abitaziuns vegnir privads permanentamain dal martgà speculativ e vegnir segirads a lunga vista per la populaziun.
