Elecziuns 2023: Sandra Locher Benguerel renunzia a candidatura

La cussegliera naziunala Sandra Locher Benguerel ha informà gievgia avantmezdi, a chaschun d’ina conferenza da medias da la PS Grischun, davart sia decisiun da betg pli candidar per las elecziuns 2023. Dentant sa preschenta Jon Pult danovamain a la cursa per in sez en il Cussegl naziunal. La PS Grischun è er en quella nova situaziun da partenza plain speranza da defender ses dus sezs en il Cussegl naziunal.

La gronda surpresa per la publicitad: Sandra Locher Benguerel, cussegliera naziunala da la PS Grischun, na candidescha l’atun 2023 betg per ina reelecziun. A la conferenza da medias ha ella motivà sia decisiun. Locher Benguerel è sa preschentada a las medias ensemen cun ses collega en il Cussegl naziunal Jon Pult ed il president da partida Andri Perl. Pult ha confirmà a quella chaschun da vulair sa preschentar danovamain per l’elecziun. Perl ha exprimì ses dischplaschair per la decisiun da dunna Locher Benguerel, ha dentant er explitgà pertge ch’el saja perschuadì che la ps è bain preparada per defender omadus sezs dal Cussegl naziunal. 

Nova orientaziun da Sandra Locher Benguerel 

Dapi l’onn 2006 represchenta Sandra Locher Benguerel ses electorat e sia partida cun grond engaschament en differents uffizis. L’emprim sco substituta en il Cussegl grond, lura sco deputada e dapi 2019 sco cussegliera naziunala. Per la fin da la legislatura vul ella s’orientar nov e renunzia perquai a la candidatura tar las elecziuns l’atun 2023. „Jau hai decidì da metter, en ina nova fasa da vita, l’accent sin mes interess da basa en la furmaziun e da m’engaschar per uffants e giuvenils.“ Locher Benguerel vegn a sa concentrar a partir dal 2024 sin sia professiun da magistra e sin la lavur en il comité directiv da l’Uniun svizra da magisters e magistras.  

Betg ina decisiun simpla 

Locher Benguerel ha declerà quant difficila che la decisiun è stada per ella. Ella è il resultat da plirs mais da ponderaziuns e da dialog intensiv, avert ed amiaivel cun la PS Grischun. Cun quella chaschun ha ella sutlingià ch’ella fetschia anc adina cun grond plaschair sia lavur sco cussegliera naziunala, ch’ella haja cumbinà durant blers onns professiun, politica e lavur en uniuns: „Jau fatsch memia bler gugent! Ma jau na sun betg buna da far tut quai parallel e durant in temp pli lung.“ Fin a la fin da la legislatura resta la profilada politicra en fatgs d’egualitad e da furmaziun en uffizi. Ella s’engascha vinavant cun tutta forza en la cumissiun per Scienza, furmaziun e  cultura. Plinavant dastga la ps quintar cun ella sco commembra activa era en avegnir. 

Plainamain motivà: Jon Pult candidescha

Jon Pult vegn a sa preschentar danovamain sco candidat per il Cussegl naziunal. Er sche l’idea da stuair far il cumbat electoral senza sia collega e buna amia Locher Benguerel fetschia mal, vegnia el a sa preschentar plainamain motivà a la reelecziun. Pult vul cuntinuar sia lavur en il parlament ed en la direcziun naziunala da la ps. I saja in grond privilegi per el d’astgar represchentar a Berna la populaziun grischuna e las valurs progressivas da la partida socialdemocratica. Ed el aschunta: «Gea, jau giaud l’uffizi da cusseglier naziunal!» Actualmain è Pult president da la cumissiun Traffic e Telecommunicaziun dal Cussegl naziunal e vicepresident da la PS Svizra. 

La ps plain speranza per las elecziuns 

Suenter ils votums da Pult e Locher Benguerel ha Andri Perl declerà la nova situaziun da partenza da la ps. Il president da la PS Grischun deplorescha la decisiun da sia cussegliera naziunala en uffizi, ma el ha er exprimì sia chapientscha persuenter. Tut en tut saja la ps en ina megliera situaziun da partenza che l’onn 2019. Perquai vegnia la partida er esser buna da defender omadus sezs. Auter che avant quatter onns sa preschenta la ps cun in cusseglier naziunal en uffizi – e pir anc cun in fitg profilà. La ps sa stenta plinavant per ina nova ediziun da l’allianza per il clima, vul dir la colliaziun da glistas cun ils verd-liberals e la Verda Grischun. Per finir ha Andri Perl renvià a la ferma performanza dals socialdemocrats dals davos onns: il crescher constant da la fracziun da la ps en il Cussegl grond dapi il 2010 da 12 sin 27 commembers, bleras fatschentas da success, da la tgira d’uffants sur il Green Deal fin il nov sistem electoral, cun success tar elecziuns communalas (per exempel l’elecziun da Philipp Wilhelm sco landamma da Tavau). A quai s’aschunta la creschientscha permanenta tar ils commembers e las commembras. La ps avra uss ina fanestra da candidaturas per candidats e candidatas interessads e vegn a nominar sia glista il di da partida dals 15 d’avrel 2023. 

La formulaziun autentica sa chatta en la mappa da medias aschuntada. 

Per ulteriuras infurmaziuns:

Sandra Locher Benguerel 

079 658 13 53 (cuntanschibla fin mezdi ed a partir da las 17 uras)

Jon Pult

076 508 16 33

Andri Perl

079 311 05 91