Suenter la demissiun dal president da partida Andri Perl ha la PS Grischun elegì sco successura Julia Müller, a chaschun dal di da partida dals 17 da favrer. Julia Müller è da Favugn, giurista, deputada dal Cussegl grond e già stada vicepresidenta da la partida ils davos quatter onns. Il nov vicepresident è Lukas Horrer.
Julia Müller maina da nov la PS Grischun. Sonda passada ha il di da partida da la PS elegì ella cun grond applaus sco presidenta. Müller succeda cun quai ad Andri Perl che ha annunzià il november passà da sa retrair per entant da la politica. Al di da partida ha la partida prendì cumià dad el.
Giuvna ed experimentada Cun la persuna da Julia Müller ha la PS Grischun dà confidenza ad ina giuvna presidenta cun gronda experientscha politica. Suenter che Müller aveva tgamunà la Juso chantunala, ha ella surprendì il presidi da la secziun da la PS Il Plaun. L‘onn 2017 ha ella lavurà sco assistenta da fracziun per la PS en il Cussegl grond. A partir dal 2018 fa ella sezza part dal parlament chantunal sco deputada dal circul da Trin. Actualmain è l’abitanta da Favugn presidenta da la cumissiun per giustia e segirezza dal Cussegl grond. Durant ils davos quatter onns era ella plinavant già vicepresidenta da la PS Grischun ed ha en quella funcziun già manà cun success pliras campagnas da votaziun e d’elecziun. Professiunalmain lavura Julia Müller en temp parzial sco assistenta a l’universitad. Accents politics vuless dunna Müller metter sin il rinforzament da la partida en las regiuns. Auters temas ch’ella vuless metter en il center da sia lavur èn l’abitadi pajabel, il svilup da kitas e scolas dal di ed il traffic public.
Lukas Horrer daventa vicepresident Sco vicepresident ha il di da partida elegì Lukas Horrer. Horrer è anteriur president da fracziun da la PS Grischun. Avant aveva el manà plirs onns il secretariat da partida da la socialdemocrazia grischuna. La PS Grischun sa legra che Lukas Horrer è sa decidì da turnar anavos en la politica grischuna suenter ch’el n’era betg vegnì reelegì en il Cussegl grond.
Sper las elecziuns per il presidi ha la PS Grischun era occupà danovamain sezs vacants en la direczi-un ed en la suprastanza da la partida. Novs commembers da la direcziun (da 15 persunas) èn Seraina Schutz, presidenta da la PS Alvra-Surses, Lorenzo Baldassarre, giurist e candidat per il cussegl com-munal da Cuira e Davide Vassella, vicesindaco da Poschiavo.
