“La fermezza dal pievel sa mesira vi dal bainstar dals flaivels”, stat scrit en nossa Constituziun federala. Nus ans engaschain per ina societad, en la quala mintgina e mintgin po sa sviluppar libramain. Ina societad, en la quala i dat dentant ina rait sociala che impedescha ch’insatgi croda tras las anzas. La PS vul in’economia ch’è qua per ils umans e betg il cuntrari. Tgi che lavura en la Svizra ritga, duess pudair viver da sia paja. Nus essan persvadids che nus vegnin pli lunsch, sche betg mo mintgin guarda per sasez. La Svizra ha ina rait sociala solida e bunas infrastructuras publicas. La PS ha contribuì bler a quai. Senza PS na dessi nagina AVS, nagina assicuranza da maternitad e nagin dretg da votar per las dunnas.

La PS fa dapi passa 125 onns politica per tuts, enstagl d’in pèr paucs privilegiads. Nus schain gea ad ina Svizra cuminaivla empè d’in cunter l’auter.

Ma nus na vulain betg ans cuntentar cun quai ch’ins ha cuntanschì. Nus essan persvadids che la Svizra po daventar pli gista, pli innovativa e progressiva. Sche nus ans engaschain consequentamain sin las energias regenerablas, protegin nus noss ambient e stgaffin plazzas da lavur duraivlas ed innovativas. Sche nus mettain sin la furmaziun e l’integraziun, creain nus perspectivas ed impedin la dischoccupaziun. Sche nus investin en la construcziun d’abitaziuns cooperativa, gidain nus a privar il terren da la speculaziun e procurain per abitaziuns pajablas. Curt: la PS fa ina politica per tuts empè da paucs.