Dapi onns èsi il medem gieu: Il chantun budgetescha cifras cotschnas e suggerescha cun quai pressiun da spargnar, entant ch’il retgav da l’onn demussa lura in gudogn gigantic. La ps pretenda ch’il nov resultat da record vegnia investà per il cumbat cunter la mancanza d’abitaziuns en il Grischun. Ed il chantun duai far quai cun stgaffir in fondo per spazi d’abitar ed al alimentar cun 250 miliuns francs.
Il resultat da record sa metta en retscha cun in’entira seria da preventivs fallàs en ils davos onns. Quai demussa ch’il chantun ha in grond spazi da manovra finanzial. E quel sto el uss duvrar per cumbatter la gronda mancanza d’abitaziuns che regia en il chantun Grischun. El duai far quai cun stgaffir in fond ch’el alimentescha per cumenzar cun 250 miliuns francs, per sustegnair las vischnancas en lur stentas da cumprar terren per la construcziun d’abitaziuns d’util public. La ps ha inoltrà durant la sessiun da fevrer in postulat da fracziun che possibilitscha tranter auter er quest. Ina refusa fiss absolutamain nunchapibla.
Fondo per spazi d’abitar sustegna las vischnancas
La mancanza d’abitaziuns en il chantun Grischun n’è betg simplamain il problem da singulas vischnancas. Ella tutga grondas parts dal chantun e regia spezialmain en regiuns ch’èn gia smanatschadas da depopulaziun. Enfin uss ha il chantun refusà mintga agir cun mussar vi sin la responsabladad communala. Sche la regenza na vul betg purtar ina corresponsabladad per in fiasco demografic, sto ella uss finalmain vegnir activa e sustegnair substanzialmain las vischnancas. In fondo per spazi d’abitar fiss in bun med persuenter. Vischnancas che cumpran terren per possibilitar la construcziun d’abitaziuns d’util public, pudessan retrair da quest fondo fin 50 pertschien dals meds necessaris.
Per informaziuns supplementaras:
Andri Perl president da la ps dal Grischun 079 311 05 91
